راعي التاكسي

موضوع: راعي التاكسي الأحد أغسطس 02, 2009 5:39 pm

حميد راعي التاكسي قصة روعة ,,
السلام عليكم
إنسان عادي مثل باقي الناس اسمه حميد .
حميد في يوم من الأيام اختربت سيارته, وماكان جدامه إلى انه يستخدم سيارة التاكسي, الي راعيه مسافر, و إلي هو كفيله.
عشان يقضي مشاوير .
كانت هناك بنت آيه في الجمال
حصة كانت معزومه على عرس صديقتها فراحت هي وأختها مريم. وبنت خالتهم منى .
ركبوا السيارة مع السائق وهم في نص الطريج اختربت سيارتهم, وقفوا في الشارع, والسائق أيحاول يتفلسف ويصلح السيارة ولكن مافي فايدة .
وفي نفس الوقت حميد كان نازل البنك, يسحب من ماكينة السحب الآلي, وهو راكب التاكسي, إلا بثلاث بنات يفتحون باب التاكسي ويركبون .
مريم : رفيق سير قاعة الأعراس .
حميد مستغرب وحاير ويكلم نفسه شو اسوي شو هالورطه
والله فشله, صرنا رفيق بعد, يالله مشي .
حميد : زين ماما .
مريم : وهي محرجه أنا مب أمك .
حصة : اسكتي هايل الهنود جي رمستهم .
المهم حميد وداهم المكان المطلوب وهو طول الوقت عايش بجو غريب يتخيل نفسه لو كان سائق تاكسي ويقول الله يعينكم يالهنود.
حميد..وصلهم المكان المطلوب وقبل نزولهم من التاكسي أعطوه عشرة دراهم.
صاحبنا خذ العشرة وهو مسكين مب عارف شو ايسوي لازم يأخذ الفلوس حاله مثل باقي التكاسي ، وهم نازلين .
منى : رفيق جيب الباقي.
حميد : وهو في حالة ارتباك.. كم يبغي ماما .
منى :هات خمس شو أول مره أتوصل ناس!؟
حصة : منى انزين اشوي اشوي على الريال.

نزلوا البنات اشوي بعيد عن القاعة عشان محد أيشوفهم نازلين من تاكسي .
وراح حميد وهو يضحك من فالموقف ويقول منو يصدق هالسالفه
في القاعة بعد ماقعدو في أحد الطاولات .
حصة: منى وين موبايلي .
منى : مب عندي.
حصة: مريم موبايلي عندج.
مريم : لا يمكن نسيتيه في البيت.
حصة : لا كان عندي في التاكسي.
منى : عيل طاح عنج في التاكسي.
حصة : مريم , منى, حد فيكم يتصل على موبايلي يمكن أيرد عليكم راعي التاكسي .
اتصلت مريم كم مره محد رد وجربت منى بعد محد رد .
حميد في التاكسي وما يدري انه شي موبايل على الكرسي و كان على الهزاز .
حميد راح المصبغة ايب ملابسه ولما وصل المصبغه.. الهندي كان ايحط الملابس في الكرسي اللي ورا ، جان أيقول أرباب في موبايل مني
صاحبنا شل الموبايل ، قال أكيد هذا مال حد من البنات اللي ركبو وياي أنا ناقص طول لسانهم ؟! شاف الموبايل مفول من المس كول ، قال لزم بيتصلون أيدورونه ، حط الموبايل على حضنه وهو يسوق ، وبعد اشوي اهتز الموبايل ...
حميد: الوووو
مريم : الوو رفيق وين انته جيب موبايل مال انا
حميد : ماما أنا معلوم أنتي.. أنتي حرمه مال شاديه
مريم : مالت عليك.. هيه مال شاديه. تعال عقب ساعة, وجيب موبايل, وودنا البيت بعد.
حميد: زين ماما واحد ساعة بعد.
مريم: أنا مب أمك.. يالله لا تنسى
حميد : ايكلم نفسه شو هاالورطه اللي أنا فيها.. أنا أهلي مايبهم من الأعراس,, وصدعت الأعراس,, أنحكم علي ايب بنات الناس وتهزأ .
بعد ساعة سار حميد نفس المكان,, ويو البنات الثلاث جان يدقلهم هرن وهو منزل راسه عشان محد ينتبه حق ملامحه ، جان يركبون
التاكسي .
منى : فضحتنا ادقق هرنات.. كل العالم شافونا ونحن نركب الروزرايز مالك ؟!
مريم : شفتوا العروس؟؟ وايد أحلا من المعرس.. هو شكله اقصر منها .
حصة : يالله الله يوفقهم مادام ايحبون بعض بيعيشون مرتاحين.

يتبعـ...

موضوع: رد: راعي التاكسي الأحد أغسطس 02, 2009 5:44 pm

منى: شو هالاكل.. لاعت جبدي.. مادري من وين مسوينه
بنمر مطعم ناكل شي أنا يوعانه.
مريم: هيه والله حتى أنا .
حصة : بس بناخذ سندويجات بسرعة عشان مانتأخر ورانا محاضره.. أمي بتهزئنا على التأخير.
مريم : عيل بنسير هوت برغر, على طريجنا.
منى : رفيق سير هوت برغر.
حميد: زين ماما
مريم : منى. هذا ولد منو؟؟ ولدي ولا ولدج؟؟
منى : ولد أي حد يركب وياه .
حميد وهو يكلم نفسه: اطنزوا ترا هندي استويت. لزم اتحمل
وصلوا الجماعة الهوت برغر وكل وحده طلبت اللي تباه
حصة: رفيق.. يبغي ياكل شي؟؟
حميد : لا ماما أنا الحين سوي أكل.
مريم: هذا مال همبورغر.. هذا مال كيما وبراتا
المهم الجماعة خذو طلباتهم وراحو البيت
وهم في الطريج البيت رن موبايل حميد ، حميد شاف التليفون مكتوب البيت قال في نفسه هاي الوالدة "اتصلتي في وقتج يا أمي"
حميد: الووووووووو
أم حميد: وينك
والبنات طبعآ في التاكسي ويسمعون الحوار اللي بيدور
حميد: والله شو اقولج يامي
أم حميد: خير أبويه شو بلاك
وقال السالفة حق أمه بالتفصيل وباللهجة المحلية
البنات من سمعوا الرمسه اتغشوا وسكتوا وتموا مثل
الأصنام ولا همس !!! ،المهم نزلهم حميد وهم نازلين................
حميد : هاي الخمس دراهم مالكم أنا مب راعي تاكسي خذوها
نزلوا البنات وهم في حالة اندهاش !!!!؟؟
دخلوا البيت وراحوا الغرفه وكل وحده اتشوف الثانية ومب عارفة شو اتقول ..
حصة : معقولة اللي صار
منى : اسكتو عني أنا روحي متفشله لين الحين
مريم : أنا شو أقول.. أنا اكثر وحده هزأته ..
حصة : بصوت عالي الحقو ... نسيت موبايلي مرة ثانيه في التاكسي
مريم: شوووووووووووو ؟؟
منى : مب وقت النكت الحين
حصة: صدق والله. يوم طلعت الفلوس حق المطعم, طلعت الموبايل من الشنطه, جان أنساه على الكرسي ،شو الحل ؟
مريم : أنا لو تموتون مابتصل مالي ويه
منى: حصة لا تطالعيني.. أنا صح ويهي لوح.. بس هذا مواطن لا تقوليلي اتصلي
تمت حصة حايره.. شو أسوى اتصل شو أقول ؟؟
حميد روح البيت ولما وصل , كانو طالبين منه أغراض ايبها من
السوبر ماركت وهو ينزل الأغراض ، شاف الموبايل طايح تحت السيت مال التاكسي.
قال : معقولة!!؟ شو هالحاله ؟؟
المهم حميد شل الموبايل وياه وراح حجرته وحط الموبايل عند موبايله وتم طايح على السرير لين ماغفل .
حصة في البيت وتفكر في حل وبعد تفكير يلست تقنع نفسها شو يعني أنا بتصل وبقوله ابغي موبايلي مافيها شي ،بس الحين الساعة ثلاث في اليل عادي هذا أكيد واعي وبعدين أنا بتصل على تليفوني .
المهم اتصلت حصة
حميد وهو راقد: الوووووو
حصة : الووووووووووو
حميد راقد ولا يدري شو مستوي وناسي الموضوع ويتحسب المكالمة على موبايله
حميد : منو أنتي؟
حصة : أنا صاحبة الموبايل
حميد: أنتي فاضيه متصلة على موبايلي وتتمصخرين ويسد الموبايل في ويها
حصة :أتكلم نفسها هذا راقد صدق ولا يتمصخر.

قام حميد من الرقاد الساعة ثمان ،وهو يسبح قال أنا جني كلمت حد في الليل ؟ ليكون البنت !! المهم طلع من الحمام وشيك على الرقم والوقت .

حميد وهو يكلم نفسه: أنا شو خبصت؟؟
المهم تم حميد حاير شو يسوي قام واتصل على الرقم اللي اتصلت منه البنت لكن طلعله المسج المشؤوم .
(ليس لديك الرصيد الكافي) .
حميد : تليفون البنت مافية رصيد كيف اتصل من تليفوني مب حلوه
راح واشترى بطاقة من الدكان ، ودخل الرصيد.. وبالغلط اتصل على تليفونه من موبايل البنت ، جان إيرن عنده.. وقال أنا غبي وين
متصل ؟؟
المهم بعد فتره رن تليفون حصة اللي عند حميد .
شذى : الوووووووو حصوة
حميد : الووووووووووو
شذى: منو انته؟؟
حميد: ماما أنا نفر مال تاكسي.. هذا حرمه يخلي تليفون داخل السيارة.
شذى : انزين رفيق, انته مايبند التليفون الحين, أنا يخلي نفر مال تليفون يسوي تليفون .
حميد : زين ماما والمسكين من كثر مامثل دور الهندي قام يرمس ويهز راسه .
شذى : الووووو مريوم وين اختج حصوة
مريم: ويه راسج الناس ايسلمون قبل… لحظه
حصة : الوووووو ها شذوه بلاج؟
شذى: حصلت تليفونج.
حصة وهيه مستغربه: تلفوني ؟وين؟ وكيف وصل عندج؟
شذى: مب عندي ، اتصلت فيج ورد علي الهندي راعي التاكسي .
حصة: خلاص الحين بشوفه يالله باي.
حصة: الوووووووووو
حميد : نعم
حصة : اخويه: أنا صاحبة التليفون.
حميد: هلا أختي.. اسف يوم اتصلتي أنا كنت راقد ..
حصة: حصل خير كيف اقدر اخذ التليفون؟
حميد: مب مشكله انا بيبه البيت
حصة: لاااااااااا بتسببلي إحراج ونته عارف ليش
حميد: على راحتج وين تبيني ايبه
حصة : اتعرف المركز ألا فلاني
حميد : هيه
حصة: إذا مافي تعب عليك.. وده الأستار بوكس.. وعطه اللي على الكونتر.. وقوله وحده بتي تأخذه.. وأنا الحين بتصل فيهم.
حميد: إنشاء الله
حصة : شكرآ اخويه وأنا أسفه على الإزعاج.
__
حميد: افااا عليج أنا اللي لازم اتأسف.
حصة: على العموم يالله مع السلامة.
حميد: في أمان الله.
حميد راح وودى التليفون المكان المتفق عليه وراح أيقضي مشاويره وحصة راحت وخذت موبايلها .
حميد دش البيت وخلى موبايله في السياره ، وخذ دوش وطلع .
ركب السيارة, وحصل خمسة مس كول, شاف منو متصل.. مرتين
فيصل ، ومره محمد ، ومره علي ، بس الرقم الخامس غريب.. نسى انه اتصل على تليفونه من تليفون حصة بالغلط ..
حميد: شو هالرقم الغريب!! منو متصللي.. رقمي يديدمن يومين مطلعنه.
ومحد يعرفه إلا كم واحد وأنا مخزن ارقامهم ،خلني أشوف منو هذا
حميد : الو
حصة : الو
حميد: عفوآ أختي منو متصلي على الموبايل
حصة : محد اتصلك اتأكد من الرقم
حميد: مب الرقم .........
حصة : صح.. بس أنا ماتصلت على هالرقم, واصلآ أنا كنت ناسيه تلفوني في التاكسي .
حميد : اسف أختي أنا راعي التاكسي بس مادري يمكن بالغلط اسمحيلي
حصة : حصل خير
وكل منهم سكر التليفون وسرح اشوي.. معقولة اللي قاعد أيصير؟ معقولة هالصدف .؟؟
حصة : وهي يالسه تذكر كل اللي صار وشاله الموبايل في ايدها ومن غير ما تشعر جان أتخزن الرقم وكتبت مكان الرقم
(راعي التاكسي)
وحميد خزن الرقم بس ماكان قصده يتصل أو أي شي بس للذكرى وكتب عند الاسم (الصدفة)

موضوع: رد: راعي التاكسي الأحد أغسطس 02, 2009 5:46 pm

ومرت الأيام والأشهر على هالموضوع وكل منهم كان بين فتره والثانيه يذكر القصة ويسرح لكن بدون ما يكون في باله شي غير الاحتفاظ بالذكرى الحلوة .
وبعد ست اشهر .
كان حميد يتمشى في مركز تجاري ويا واحد من الربع اسمه فيصل
فيصل : ابغي اشتري عطور .

حميد: هذا وقت عطور.. انته محد يسير وياك.
فيصل: ذليتنا عاد دقايق بنشتري وبنطلع
حميد : أنا ماعرف سوالفك؟ انته ما تشتري بسرعة.
فيصل: لا هاي المرة عارف شو ابغي
حميد : يالله صداقتك طالعه عليه أغلا من بيع السوق
فيصل: مايسوى عليه هالعطر
حميد : يالله طوف طوف
دخلو الشباب المحل وفيصل رد حق عادته وايدور وكل اشوي حميد.. شو رأيك بهذا وهذا .
حميد : ما يخصني.. دور اللي تبغيه روحك ..انته ماينسار وياك..
حميد وهو يالس يجلب عينه في المحل والمحل كله مرايات وكان ايشوف المحل عن طريق المرايات ، يت عينه على مستلزمات التجميل والميك اب وفجأة شاف حصة !!! ، نفس الوكت حصة شافت حميد !!! وهو شافها بس عن طريق المرايات من غير محد منهم يقدر أيحدد وين مكان الثاني وكان الوقت أيمر بطريقه غريبه الثواني كانت أطول من الساعات وكل منهم مب قادر ايشيل عينه عن عيون الثاني
وبعد لحضات التفت حميد على حصة والتفتت هيه عليه وهاي المرة من غير مرايا ...

وشوي .. فيصل من غير مايلاحظ .. يالله نطلع أنا خلصت.. وطلع فيصل مع حميد, وكانت حصة طالعه في نفس اللحظة وطلعوا الثلاثة من الباب في نفس الوقت, وكانت حصة على اليمين وبعدين حميد وبعدين فيصل
وهم عند الباب ومن غير قصد ضرب كتف حميد في كتف حصة ، وحصة خذت اليمين من باب المحل وحميد وفيصل من اليسار ،وتم حميد ساكت ! أتغير180 درجه ، وحصة نفس الشي .
حميد يكلم نفسه: معقولة هاي الصدفة ؟؟!
حصة: أتكلم نفسها هذا حلم اللي صار ولا واقع؟!
حميد: شو اللي صار شو هالقدر اللي جمعني فيها
حصة: مب معقولة أنا موب امصدقة شو هالشعور اللي صابني مره وحده!؟!
حميد : أنا شو اللي صار فيني معقولة ؟

كل واحد فيهم مانام في هاي الليلة .حميد لازم أكلمها بس كيف وبأي حق ، قصدي شريف, بس أنا شو عرفني هاي البنت, يمكن مخطوبة, ولا مرتبطة, وحتى لو لا، مب من حقي اتصل فيها ،بس شو أسوي وأنا مب عارف أفكر انشل تفكيري كامل . تذكر رقم تليفونها المخزن في تليفونه وقام وكتب مسج ،
( حسيتي بالي حسيت فيه) ، وطرش المسج .
وكانت حصة سرحانة وما عطت المسج أهميه وهي تفتح المسج انتبهت مكتوب المرسل (راعي التاكسي) ، ومن غير ماتحس ومن الارتباك مسحت المسج ، اتخبلت أنا شو سويت ؟؟!! وتمت تلوم نفسها شو أسوي؟ اتصل؟ شو أقول؟ أنا مب عارفة شو كان مكتوب في المسج..
شو اسوي؟ كيف أتصرف؟ وبعد تفكير اطويل لقت حل للمشكله.
وهي على نياتها وكانت في حالة توتر وكتبت
(معك الاتصالات الرجاء إرسال المسج مره أخره للرقم الذي أرسلت له قبل قليل)

وصل المسج عند حميد قال شو السالفة؟ بطرش مره ثانيه
(حسيتي بالي حسيت فيه)
وصل المسج عند حصة وقرته .
حصة : شو أقول؟ وشو أرد؟ يلست تفكر وبعد اشوي
كتبت (إحساس غريب ما قدرت أفهمه)

حميد تشجع واتصل
حصة : معقولة اتصل؟ شو اسوي؟ أرد؟ شو أقول؟ برد!!
حميد : الووووو
حصة : ساكته
حميد : الووووو
حصة ما ترد.
حميد : الظاهر أنا غير مرغوب فيني مع السلامة
حصة : لا لا لا لاتبند
حميد : ممكن سؤال
حصة : ………. أتفضل
حميد : أنتي مرتبطة بحد او محجوزة حق حد
حصة : ……….. لا
حميد : ممكن أتقدم لج
حصة : مستغربه وزادت دقات قلبها انته شو اتقول؟
حميد : أنا قلت شي غلط؟
حصة : لا بس انته ما تعرف عني شي, وكيف ترضى تتزوج وحده كلمتك بالتليفون ؟
حميد : ليش يعني شو صار لما كلمتيني في التلفون
حصة : ليش انته مب شاب مثل باقي الشباب اللي ما عنده استعداد يتزوج وحده كلمتها بالتلفون!!
حميد : ومنو قالج أنى إذا اتزوجت وحده ما كلمتهابالتلفون ما بتكون كلمت حد غيري قبل الزواج
حصة : بس لازم تتأكد من أخلاقي قبل
حميد : وشو ألفايده الموضوع طلع من أيدي
حصة : عند منو الموضوع
حميد : قلبي
حصة : انته شو اسمك
حميد : حميد
حصة : عاشت ألا سامي وانا
حميد : لا تكملين حصة
حصة : كيف عرفت
حميد : يوم اتصلت اربيعتج يوم كان موبايلج عندي قالت حصوه
حصة : حميد
حميد : هلا
حصة : بصدقني إذا قلت لك انك أول ريال غريب أكلمه
حميد : حصة .. اتصدقين انج ريحتيني بكلمتج هذه
حصة : حميد
حميد : أعيوني!!
حصة : ممكن أتفكر اكثر وما تسرع؟.
حميد : ممكن رقم بيتك عشان أهلي يتصلون ويحددون زيارة لأهلي.
حصة : يعني مصمم؟
حميد : هيه ولا ما يشرفكم راعي تاكسي
حصة : محشوم انته ولد حلال بس ممكن اتكلمني عن وضعك
حميد : أنا وحيد أمي وأبوي, وأبوي متوفي وأنا عايش مع الوالدة موظف وراتبي 9 آلاف، وعدنا فلا اصغيره عايشين فيها أنا وامي ,عدنا ثلاث بيوت جدام مأجرينهم ويدخلون بحدود 4 آلاف في الشهر ومب مرتبط .
حصة : كم عمرك ؟
حميد : 27 سنه.
حصة : كانت لك علاقات من قبل؟
حميد : أقص عليج إذا قلت لا بس الحين محد بحياتي من قبل لا اعرفج.. حتى رقم موبايلي مغيرنه محد يعرفه غير اشوي من ربعي
حميد : بعد تبين تعرفين شي ؟
حصة : سلامتك
حميد : ممكن الرقم
حصة : اوكيه
وتصلو آهل حميد بأهل حصة وصار النصيب وتزوجا في نفس الصالة اللي وصلهم فيها حميد يوم كان
راعي التاكسي

صدق طويله القصه بس رائعه

تقبلو تحياتي

موضوع: رد: راعي التاكسي الأحد أغسطس 02, 2009 9:31 pm

هههههههههههههههه

قصـه مسليـه بالفعـلـ.
فيهـا بين الوهلـة والاخــرى
لمحــات مسليـه اكثــر مثلـ.

أنتي فاضيه متصلة على موبايلي
وتتمصخرين ويسد الموبايل في ويها

ومن اللغه .. مبين على كاتب القصه
شخـص اماراتـــي

يسلمــو علــى الاختيــار
اختـي ::دمــوع الكوثــر::

دمتِ لنــا
تحيتــي

|
:
.
R.Q.7

عاشق كواريسما

لك الف تحيه على المرور هنا

تسلم عزيزي

خخخخخخخ
صج روعه خوش قصه

مره راعي تاكسي مره صدفه ومره ومره

ولي يزيد الحب بعد..

لاتحرمينا من القصص الحلوه

تحياتي

احلى بنوته

الاحلى مرورك هنا

دمتي دوما

احــداث مشيقه
ورومنسيــه بعـد

يسلمـو اختي دموع على القصه الحلـوه
ننتظــر القــادم

احلى حلم

احلى حلم

يسلمو على المرور